Irun - Hondarribia - Hendaye
Bidasoa-Txingudiko berriak
Hendaiako Udalak herritarrei jakinarazi die dragatze-lanen bigarren fasea urtarrilaren 5ean hasiko dela, obretako ekipamendua instalatuta. Lanak otsailean hasiko dira. Informazio praktikoa deskarga daitekeen PDF formatuan erantsi da, bereziki obrak irauten duen bost hilabeteetan hondartzaren erabilerari dagokionez.
Hondarribiak, Irunek eta Hendaiak, Bidasoa-Txingudi Mugaz Gaindiko Partzuergoaren bitartez, "Itsu Koplak" antolatu dute, ohikoa ez den bertsolaritza jardunaldia, abenduaren 14an, 17:00etan, Hondarribiko Itsas Etxean. Jarduera honek sarrera librea eta doakoa du, edukiera bete arte, eta adierazpen kultural hori hurbiltzea du helburu, bai tokiko publikoarentzat, bai euskara eta euskal kulturan hasten ari direnentzat.
"Itsu Koplak" bertso paperak izeneko modalitate tradizionalean oinarritzen da. Bertsolariek, publikoarekin elkarreraginean aritzeaz gain, irudiak, bideoak eta testuak erabiltzen dituzte bertsoa inprobisatzeko. Oraingo honetan, Ane Labaka eta Sustrai Colina izango dira emandako materiala kopletan eta zortziko txikietan eraikitako istorio bihurtuko dutenak, giro hurbila, dinamikoa eta parte-hartzailea bultzatuz.
Erabiltzen ez den tradizioa berreskuratzen duen formatu hau, garai berrietara egokituz, bereziki diseinatuta dago publiko anitza erakartzeko, bai bertsozaleak, bai adierazpen kultural honetara lehen aldiz hurbiltzen direnak. Gaien ikusgarritasunak eta metriken laburtasunak erraztu egiten dute euskara ikasten ari direnek ere jarduna zailtasunik gabe jarraitzea.
-
Irun, Hondarribia eta Hendaiako hamar ikastetxek, 34 taldetan antolatuak, parte hartu dute euskara modu ludikoan sustatzea helburu duen mugaz-gaindiko ekimen honen lehenengo edizioan.
Irun, Hondarribia eta Hendaiako Udalek, Bidasoa-Txingudi Mugaz Gaindiko Partzuergoaren bitartez, Egin Ttap! Bidasoaldea, eskualdeko haurren artean euskararen erabilera sustatzeko lehiaketa digitala.
Jarduera irailaren 22tik urriaren 24ra bitartean garatu da, eta Irungo eta Hondarribiko Lehen Hezkuntzako 3. eta 4. mailako ikasleek eta Hendaiako CE2 eta CM1eko ikasleek parte hartu dute. Taldeka edo ikasgelaka lehiatu dira, kulturari, naturari, ortografiari, ezagutza orokorrari eta eskualdeari berari buruzko galdera-sortei erantzunez.
Guztira, hamar ikastetxek hartu dute parte proiektu honetan. Izena eman duten 34 taldeetatik 23k bost galdera-sortak osatu dituzte, eta azken sailkapen orokorra egitea ahalbidetu duen puntuazio metatua lortu dute.
Jokoa sailkapen bat izan arren, Egin Ttap! Bidasoaldeak ez du izaera lehiakorrik, ezta saririk ere, bere helburua gazteen artean euskararen erabilera modu dibertigarri eta parte-hartzailean sustatzea baita.
"Ekimen honen helburua euskara mugaren bi aldeetako haurren arteko harremanetarako hizkuntza gisa indartzea da, jolasaren eta lankidetzaren bidez", nabarmendu du Nuria Alzaga Bidasoa-Txingudi Mugaz Gaindiko Partzuergoko Zuzendaritza Batzordeko presidenteak.
Estitxu Urtizbera Partzuergoko Zuzendaritza Batzordeko kideak adierazi duenez, "euskara elementu komuna da mugaz gaindiko lurraldean, eta funtsezkoa iruditzen zaigu txikitatik sustatzea. Jolasaren eta lankidetzaren bidez, haurrek naturaltzat eta gertukotzat bizitzea lortzen dugu ".
Bestalde, Itziar Aizpuru Partzuergoko Zuzendaritza Batzordeko kideak gaineratu duenez, "ikasleek eta irakasleek erakutsitako gogoak erakusten du horrelako jarduerak oso tresna eraginkorrak direla eguneroko testuinguruetan euskararen erabilera dinamizatzeko".
Proiektuak harrera ona izan duenez, erakundeak bigarren edizio bat planteatu du 2026an, Irun, Hondarribia eta Hendaiako euskara sailekin elkarlanean.
Irun, Hondarribia eta Hendaiako udalek, Bidasoa-Txingudi Mugaz Gaindiko Partzuergoaren bitartez, eta Gipuzkoako Foru Aldundiaren laguntzarekin, 2025eko mugaz gaindiko kirol jardueren urteko programaren balantze oso positiboa egin dute. Bidasoaren bi aldeetako ehunka parte-hartzaile bildu dira, bizikidetza, lankidetza eta bizitza osasuntsuaren balioen inguruan.
Programa horren jardueretarako aurrekontua 48.000 €-koa da, eta % 24an finantzatzen da Gipuzkoako Foru Aldundiaren ekarpenaz. Lau ekimen sendotuk osatzen dute nagusiki: Bidasoako Itzulia, Txingudi Korrika, Bidasoko Jaitsiera Hegatsekin eta Bidasoa-Txingudi Mini-olinpiadak.
Parte-hartze handiko eta ekitaldiak sendotzeko urtea
2025ean zehar, programak beste behin erakutsi du kirola eta mugaz gaindiko lankidetza batzeko gaitasuna duela.
Bidasoa Itzulia Elkarteak antolatutako Bidasoako Txirrindulari Itzuliak, egutegi nazionaleko eta nazioarteko 23 urtez azpiko proba nabarmenetakoa, Espainia, Frantzia eta Belgikako 18 talde bildu zituen, maiatzaren 8tik 10era bitarteko 3 etapatan, lurraldearen nazioarteko proiekzioa indartuz.
Bidasoa Atletiko Taldeak antolatutako Txingudi Korrikak, Hendaia, Irun eta Hondarribia artean urriaren 5ean ospatutakoak, ehunka korrikalari bildu zituen berriro ere hiru hirien batasuna sinbolizatzen duen hitzordu batean.
Bidasoa Ibaiaren Nazioarteko Jaitsiera Hegatsekin maiatzaren 18an ospatu zen, Izurde eta Urpean kluben arteko lankidetza zabalaren ondorioz, eta Kantauriko eta Pirinioetako igeriketa eta urpekaritza klubek parte hartu zuten.
Bestalde, maiatzaren 21ean, Bidasoa-Txingudi Mugaz Gaindiko Partzuergoak berak Ficoban antolatutako Bidasoa-Txingudi Mini-olinpiadak 800 ikasletik gora bildu ziren inklusioan, errespetuan eta ohitura osasungarrietan oinarritutako jolas- eta kirol-jardunaldi batean.
Kirola, kooperazioa eta komunitatea
Nuria Alzaga Partzuergoko Zuzendaritza Batzordeko presidenteak nabarmendu duenez, "mugaz gaindiko kirol programa adibide bat da erakundeen arteko lankidetza herritarren ongizatean nola gauzatzen den erakusteko. Kirola, osasuna, hezkuntza eta bizikidetza uztartzen dira ekimen horietako bakoitzean ".
Bestalde, Estitxu Urtizberea Partzuergoko Zuzendaritza Batzordeko kideak azpimarratu duenez, "Partzuergoak bultzatzen dituen proiektuek kirolaren inguruko espazio komun bat finkatzen dute, non Bidasoaren bi aldeetako gazteek eta helduek balioak, ahalegina eta gogoa partekatzen dituzten".
Itziar Aizpuru Partzuergoko Zuzendaritza Batzordeko kideak gaineratu duenez, "aurtengo balantzeak berresten du kirola funtsezko tresna dela gure komunitateen eta tokiko kluben arteko loturak sendotzeko".
Etorkizunari begira
Partzuergoa 2026ko programa planifikatzen ari da, jardueren dimentsio parte-hartzailea eta inklusiboa indartzeko, jasangarritasuna sustatzeko eta kirolaren eta balio partekatuen bidez mugaz gaindiko lankidetza sustatzen jarraitzeko.
Lan hori indartu egin da Gipuzkoako Foru Aldundiko Kultura, Lankidetza, Gazteria eta Kirol Departamentuaren laguntzarekin; izan ere, bi erakundeek 2008an sinatutako lankidetza-hitzarmenari esker, mugaz gaindiko kirol-jardueren urteko programa kofinantzatuta dator.
• Irun, Hondarribia eta Hendaiako udalen sustapenari esker, Bidasoa-Txingudiko Mugaz Gaindiko Partzuergoaren bitartez, doakoa da Bertso Eskolako jarduera parte-hartzaileentzat.
• Irunabar Irungo Bertsoaren Bilgunea-k da Bidasoa-Txingudi Mugaz-gaindiko Partzuergoko esparruan, bertsolaritzari buruzko tailerrak egiteko kontratatutako erakundea.
Urrian hasi dira Irunabar Irungo Bertsoaren Bilguneak koordinatzen eta kudeatzen dituen mugaz-gaindiko Bertso Eskolako ikastaro desberdinak. Zabalik dago oraindik doakoak diren ikastaro hauetan izena-emateko aukera, Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera idatziz egin ahal izango dena.
Azken urteotan, bost talde desberdin ateratzea lortu du elkarteak: haur eta gaztetxoen taldea, gazte eta hasiberrien taldea, bat-bateko taldea, bertso tailerra eta bat-bateko jardunera bideratutako bertso eskola irekia. Hala eta guztiz ere, Irunabarrek urtero egituratzen ditu taldeak, biltzen dituen ikasle kopuru eta adinen arabera.
Irunabar Irungo Bertsoaren Bilguneak 16 urte daramatza Bertso Eskolako zerbitzuak eskaintzen eskualdean eta denbora tarte horretan zehar bertso-eskola haztea eta egonkortzea lortu du. 2019az geroztik, gainera, Bidasoa-Txingudiko Mugaz Gaindiko Partzuergoak bere gain hartu du ondare kultural horren sustapena eta, horren ondorioz, zerbitzuak mugaz-gaindiko izaera hartu ahal izan du, bertsolaritzako formakuntza, Bidasoko hiru herrietako jendearentzat eskaintzen.
