Bidasoa-Txingudiko berriak

• Aurrekontuez gain, Batzat Nagusiak 2024ko ekitaldiko likidazioa eta kontuak baliozkotu ditu.

• Partzuergoaren Presidentetza Irungo Udaletik Hendaiako Udalera igaro da.

• Saioan “Ibai izena duen herrialde bat” Gazteentzako Arte Digitaleko Lehiaketako saria banatu da.

Bidasoa-Txingudi Mugaz Gaindiko Partzuergoaren Batzat Nagusiak beste bilkura bat egin du Irungo Udaleko Bilkura Aretoan, mugaz gaindiko lankidetzarako funtsezko hainbat gai lantzeko.

Saioan zehar, emandako ebazpenen berri eman zaio zehaztasunez Batzar Nagusiari. Ebazpen horiek barne-antolaketarekin, kudeaketa ekonomikoarekin, laguntza eta diru-laguntzen esleipenarekin, kultura- eta hizkuntza-proiektuen sustapenarekin, eta Partzuergoaren jarduerak garatzeko beharrezkoak diren deialdi eta aurrekontu-aldaketen onespenarekin lotutako jarduketak biltzen dituzte.

2024ko ekitaldiko likidazioa eta kontuak

Saioan, Batzar Nagusiak 2024ko ekitaldiko Aurrekontuaren likidazioa eta Partzuergoaren kontu orokorrak ezagutu eta baliozkotu ditu, indarrean dagoen foru-araudiari jarraikiz.

Aurkeztutako likidazioak Partzuergoaren egoera ekonomiko eta finantzarioaren ikuspegi zehatza eskaintzen du, kudeaketaren gardentasuna bermatuz eta hurrengo ekitaldietarako aurrekontu-plangintza arduratsua egiteko oinarriak ezarriz.

Era berean, 2024ko kontuen baliozkotzeak Partzuergoak baliabide publikoen kudeaketa zorrotzarekiko duen konpromisoa berresten du, mugaz gaindiko lankidetzaren esparruan garatutako programa eta jardueren exekuzio egokia bermatuz.

2026ko Aurrekontu Orokorren baliozkotzea

Gai-zerrendako beste puntu nagusietako bat 2026ko ekitaldirako Partzuergoaren Aurrekontu Orokorrak baliozkotzea izan da.

Onartutako aurrekontua foru-araudian ezarritako egitura eta irizpideetara egokitzen da, eta proiektu estrategikoei jarraipena ematea ahalbidetuko du, baita kultura-, hizkuntza- eta mugaz gaindiko lankidetza-arloetan jarduera berriak bultzatzea ere.

Baliozkotze horren bidez, Batzar Nagusiak beharrezko egonkortasun finantzarioa bermatzen du ekimen bateratuak garatzen jarraitzeko, hiru udalerrien arteko lankidetza indartuz eta garapen partekatu eta jasangarriaren eredu batean aurrera eginez.

Aurrekontu horiekin, Bidasoa-Txingudi Mugaz Gaindiko Partzuergoak aurrera egiten jarraitzen du kudeaketa koordinatu eta planifikatuan, bere Zuzendaritza Batzordearen eta lan-batzordeen bidez, lurraldearen garapen bateratuarekiko eta Batzar Nagusiak adostutako politika eta proiektuen exekuzio egokiarekiko konpromisoa indartuz.

Partzuergoaren presidentetzaren aldaketa

Gobernantza-arloan, Batzar Nagusiak Partzuergoaren presidentetzaren aldaketa onartu du, Irungo Udaletik Hendaiako Udalera igaroz, Partzuergoaren Estatutuetan ezarritako urteko txandaketa-sistemaren aplikazioan.

Horrela, Hendaiako alkateak, Kotte Ecenarrok, Bidasoa-Txingudi Mugaz Gaindiko Partzuergoaren Batzar Nagusiaren Presidentetza hartu du; Irungo alkateak, Cristina Laborda Alboleak, Presidenteordetza Lehenengoa hartzen du; eta Hondarribiako alkateak, Igor Enparan Aranetak, Presidenteordetza Bigarrena.

Errelebo instituzional horrek hiru udalerrien arteko oreka eta erantzukidetasuna indartzen ditu, eta lankidetzan, adostasunean eta lurraldearen ikuspegi partekatuan oinarritutako gobernantza-eredua sendotzen du.

2025eko gazteentzako arte digitaleko lehiaketako sariaren banaketa

Azkenik, Batzar Nagusiari jakinarazi zaio “Ibai izena duen herrialde bat” Mugaz Gaindiko Arte Digitaleko Lehiaketako epaimahaiaren erabakia berretsi dela, June Martin Sanchez irabazle izendatuz, “Ardea, maxima regina aquarium” lanarekin.

Halaber, irabazleari 500 euroko saria ordaintzeko ebazpenaren berri eman da, Bidasoa biziriken bitartez.

Arte digitaleko tekniken bidez parte-hartzaile bakoitzeko jatorrizko lan bakarra sortzera zuzendutako lehiaketak Irun, Hondarribia eta Hendaiako paisaia bereziak eta espazio esanguratsuenak irudikatzera gonbidatzen du, betiere ingurune naturalarekin lotuta.

Hendaiako Udalak herritarrei jakinarazi die dragatze-lanen bigarren fasea urtarrilaren 5ean hasiko dela, obretako ekipamendua instalatuta. Lanak otsailean hasiko dira. Informazio praktikoa deskarga daitekeen PDF formatuan erantsi da, bereziki obrak irauten duen bost hilabeteetan hondartzaren erabilerari dagokionez.

PDF artxiboa jeitsi

Hondarribiak, Irunek eta Hendaiak, Bidasoa-Txingudi Mugaz Gaindiko Partzuergoaren bitartez, "Itsu Koplak" antolatu dute, ohikoa ez den bertsolaritza jardunaldia, abenduaren 14an, 17:00etan, Hondarribiko Itsas Etxean. Jarduera honek sarrera librea eta doakoa du, edukiera bete arte, eta adierazpen kultural hori hurbiltzea du helburu, bai tokiko publikoarentzat, bai euskara eta euskal kulturan hasten ari direnentzat.

"Itsu Koplak" bertso paperak izeneko modalitate tradizionalean oinarritzen da. Bertsolariek, publikoarekin elkarreraginean aritzeaz gain, irudiak, bideoak eta testuak erabiltzen dituzte bertsoa inprobisatzeko. Oraingo honetan, Ane Labaka eta Sustrai Colina izango dira emandako materiala kopletan eta zortziko txikietan eraikitako istorio bihurtuko dutenak, giro hurbila, dinamikoa eta parte-hartzailea bultzatuz.

Erabiltzen ez den tradizioa berreskuratzen duen formatu hau, garai berrietara egokituz, bereziki diseinatuta dago publiko anitza erakartzeko, bai bertsozaleak, bai adierazpen kultural honetara lehen aldiz hurbiltzen direnak. Gaien ikusgarritasunak eta metriken laburtasunak erraztu egiten dute euskara ikasten ari direnek ere jarduna zailtasunik gabe jarraitzea.

• Irun, Hondarribia eta Hendaiako hamar ikastetxek, 34 taldetan antolatuak, parte hartu dute euskara modu ludikoan sustatzea helburu duen mugaz-gaindiko ekimen honen lehenengo edizioan.

Irun, Hondarribia eta Hendaiako Udalek, Bidasoa-Txingudi Mugaz Gaindiko Partzuergoaren bitartez, Egin Ttap! Bidasoaldea, eskualdeko haurren artean euskararen erabilera sustatzeko lehiaketa digitala.

Jarduera irailaren 22tik urriaren 24ra bitartean garatu da, eta Irungo eta Hondarribiko Lehen Hezkuntzako 3. eta 4. mailako ikasleek eta Hendaiako CE2 eta CM1eko ikasleek parte hartu dute. Taldeka edo ikasgelaka lehiatu dira, kulturari, naturari, ortografiari, ezagutza orokorrari eta eskualdeari berari buruzko galdera-sortei erantzunez.

Guztira, hamar ikastetxek hartu dute parte proiektu honetan. Izena eman duten 34 taldeetatik 23k bost galdera-sortak osatu dituzte, eta azken sailkapen orokorra egitea ahalbidetu duen puntuazio metatua lortu dute.

Jokoa sailkapen bat izan arren, Egin Ttap! Bidasoaldeak ez du izaera lehiakorrik, ezta saririk ere, bere helburua gazteen artean euskararen erabilera modu dibertigarri eta parte-hartzailean sustatzea baita.

"Ekimen honen helburua euskara mugaren bi aldeetako haurren arteko harremanetarako hizkuntza gisa indartzea da, jolasaren eta lankidetzaren bidez", nabarmendu du Nuria Alzaga Bidasoa-Txingudi Mugaz Gaindiko Partzuergoko Zuzendaritza Batzordeko presidenteak.

Estitxu Urtizbera Partzuergoko Zuzendaritza Batzordeko kideak adierazi duenez, "euskara elementu komuna da mugaz gaindiko lurraldean, eta funtsezkoa iruditzen zaigu txikitatik sustatzea. Jolasaren eta lankidetzaren bidez, haurrek naturaltzat eta gertukotzat bizitzea lortzen dugu ".

Bestalde, Itziar Aizpuru Partzuergoko Zuzendaritza Batzordeko kideak gaineratu duenez, "ikasleek eta irakasleek erakutsitako gogoak erakusten du horrelako jarduerak oso tresna eraginkorrak direla eguneroko testuinguruetan euskararen erabilera dinamizatzeko".

Proiektuak harrera ona izan duenez, erakundeak bigarren edizio bat planteatu du 2026an, Irun, Hondarribia eta Hendaiako euskara sailekin elkarlanean.

Sailkapena jeitsi

Irun, Hondarribia eta Hendaiako udalek, Bidasoa-Txingudi Mugaz Gaindiko Partzuergoaren bitartez, eta Gipuzkoako Foru Aldundiaren laguntzarekin, 2025eko mugaz gaindiko kirol jardueren urteko programaren balantze oso positiboa egin dute. Bidasoaren bi aldeetako ehunka parte-hartzaile bildu dira, bizikidetza, lankidetza eta bizitza osasuntsuaren balioen inguruan.

Programa horren jardueretarako aurrekontua 48.000 €-koa da, eta % 24an finantzatzen da Gipuzkoako Foru Aldundiaren ekarpenaz. Lau ekimen sendotuk osatzen dute nagusiki: Bidasoako Itzulia, Txingudi Korrika, Bidasoko Jaitsiera Hegatsekin eta Bidasoa-Txingudi Mini-olinpiadak.

Parte-hartze handiko eta ekitaldiak sendotzeko urtea

2025ean zehar, programak beste behin erakutsi du kirola eta mugaz gaindiko lankidetza batzeko gaitasuna duela.

Bidasoa Itzulia Elkarteak antolatutako Bidasoako Txirrindulari Itzuliak, egutegi nazionaleko eta nazioarteko 23 urtez azpiko proba nabarmenetakoa, Espainia, Frantzia eta Belgikako 18 talde bildu zituen, maiatzaren 8tik 10era bitarteko 3 etapatan, lurraldearen nazioarteko proiekzioa indartuz.

Bidasoa Atletiko Taldeak antolatutako Txingudi Korrikak, Hendaia, Irun eta Hondarribia artean urriaren 5ean ospatutakoak, ehunka korrikalari bildu zituen berriro ere hiru hirien batasuna sinbolizatzen duen hitzordu batean.

Bidasoa Ibaiaren Nazioarteko Jaitsiera Hegatsekin maiatzaren 18an ospatu zen, Izurde eta Urpean kluben arteko lankidetza zabalaren ondorioz, eta Kantauriko eta Pirinioetako igeriketa eta urpekaritza klubek parte hartu zuten.

Bestalde, maiatzaren 21ean, Bidasoa-Txingudi Mugaz Gaindiko Partzuergoak berak Ficoban antolatutako Bidasoa-Txingudi Mini-olinpiadak 800 ikasletik gora bildu ziren inklusioan, errespetuan eta ohitura osasungarrietan oinarritutako jolas- eta kirol-jardunaldi batean.

Kirola, kooperazioa eta komunitatea

Nuria Alzaga Partzuergoko Zuzendaritza Batzordeko presidenteak nabarmendu duenez, "mugaz gaindiko kirol programa adibide bat da erakundeen arteko lankidetza herritarren ongizatean nola gauzatzen den erakusteko. Kirola, osasuna, hezkuntza eta bizikidetza uztartzen dira ekimen horietako bakoitzean ".

Bestalde, Estitxu Urtizberea Partzuergoko Zuzendaritza Batzordeko kideak azpimarratu duenez, "Partzuergoak bultzatzen dituen proiektuek kirolaren inguruko espazio komun bat finkatzen dute, non Bidasoaren bi aldeetako gazteek eta helduek balioak, ahalegina eta gogoa partekatzen dituzten".

Itziar Aizpuru Partzuergoko Zuzendaritza Batzordeko kideak gaineratu duenez, "aurtengo balantzeak berresten du kirola funtsezko tresna dela gure komunitateen eta tokiko kluben arteko loturak sendotzeko".

Etorkizunari begira

Partzuergoa 2026ko programa planifikatzen ari da, jardueren dimentsio parte-hartzailea eta inklusiboa indartzeko, jasangarritasuna sustatzeko eta kirolaren eta balio partekatuen bidez mugaz gaindiko lankidetza sustatzen jarraitzeko.

Lan hori indartu egin da Gipuzkoako Foru Aldundiko Kultura, Lankidetza, Gazteria eta Kirol Departamentuaren laguntzarekin; izan ere, bi erakundeek 2008an sinatutako lankidetza-hitzarmenari esker, mugaz gaindiko kirol-jardueren urteko programa kofinantzatuta dator.