Europako Mugikortasunaren Astea dela eta, Irun, Hondarribia eta Hendaiako udalek, Bidasoa-Txingudi Mugaz-Gaindiko Partzuergoaren bidez, datorren irailaren 16tik 22ra bitartean egingo diren hainbat jarduera antolatu dituzte hiru herrietan.
Iaz lehen aldiz batera antolatu ziren jarduerak positiboki baloratu ondoren, aurten programa zabalago bat prestatu dugu, aste osoan banatua. Oraingoan, Bidasoako txikienei garrantzi berezia emanez, adinekoak ahaztu gabe.
"Konbinatu eta mugitu!" lelopean, mugaz gaindiko ekimen honen helburua "klima aldaketaren aurka jardutearen garrantziaz jabetzea eta bizikleta erabiltzeak mundu osasuntsuago baten aldeko borrokan izan dezakeen garrantziaz jabetzea da", adierazi du Miguel Angel Paez Bidasoa bizirikeko presidenteak.
Era berean, Paezek azpimarratu du “garrantzitsua dela elkarrekin eta mugaz gaindi lan egitea. Iaz lehen aldiz koordinatu ginen hiru Udalok ekimen hau elkarrekin antolatzeko, eta lortutako arrakastaren ondoren, aurten berriro egin dugu”.
Gainera, Borja Olazabal Irungo Udaleko Kiroletako, Garapen Iraunkorreko eta Mugikortasuneko zinegotziak gogorarazi duenez, “guztiok gara klima-aldaketaren aurkako borroka horren parte, eta, iruditzen ez bazaigu ere, bizikleta erabiltzea, askotan, gure hondar-aletxoa emateko modu bat da”.
Bestalde, Hondarribiko Udaleko Ingurumen zinegotzi den Kalixa Silanesek datorren asterako aurreikusitako jardueretan “herritar guztiei parte hartzera animatzen ditut. Familian edo lagunekin egin daitezkeen planak dira, eta publikoak tarte atsegina eta dibertigarria igarotzea dute helburu, eta, aldi berean, ezagutza berriekin blaitzen dira, oso interesgarriak izan baitaitezke eguneroko bizitzan aplikatzeko.
Azkenik, Hendaiako Udaleko Itziar Aizpuruk azpimarratu du “garrantzitsua da hiru udalerriek batera lan egitea, hobetzen jarraitzeko eta eskualde gero eta jasangarriagoa eta lagunkoiagoa lortzeko”.
Bizikleta protagonista
Bi jarduera izango dira Mugikortasunaren Astean. Lehenengo ekimena, “Village vélo”, udalerri bakoitzean bizikleta bidezko mugikortasunari buruzko hainbat jarduera biltzen dituen azoka bat da. Ekitaldi honen helburua bizikletaren erabilera sentsibilizatzea eta sustatzea da.
Bigarren ekimena, “Nagusikleta”, bizikletaz ibiltzerik ez duten adinekoei bizikletan ibilaldi bat egitea eta une atsegina eta esperientzia ahaztezina eskaintzea izango da. Bi persona garraiatzeko triziklo egokituekin egiten da jarduera.
Jardueren ordutegia eta lekua
Bi ekimenak irailaren 17tik 22ra bitartean egingo dira, honako ordutegi hauetan:
● Village vélo
Irun: irailaren 17an, larunbata, 17:00etatik 20: 00etara Zabaltza plazan.
Hondarribia: irailak 18, igandea, 11:30etik 14:30era Kasino Zaharreko lorategietan.
Hendaia: irailaren 21ean, asteazkena, 15:00etatik 18: 00etara Gaztelu Zahar pilotalekuan.
● Nagusikleta
Irun: irailak 19, astelehena, Behobiatik Oxinbiribilera eta Santiagora bidegorriz.
Hondarribia: irailaren 20an, asteartea, 16:00etatik 19:00etara, Butron pasealekutik kirol-porturantz, hondartza eta babes-portua bidegorritik.
Hendaia: irailaren 22an, osteguna, EPADHetik erlaitzera, hondartzara eta badiara bidegorriz.
Jarduerak aste osoan zehar
Aipatutako jarduera horiez gain, aste osoan zehar, udal bakoitzak hainbat ekimen antolatu ditu. Hala, Irunen bizikleta martxa egingo da igandean, hilak 18, 11:00etan, eta Zubimuxuko biribilgunea izango du abiapuntu, Hondarribian hasiko den martxarekin bat egiteko. Gainera, igande horretan bertan, Txingudiko Zerbitzuek antolatuta, Bigarren eskuko Bizikleten azoka egingo da Zabaltza plazan.
Bestalde, Hondarribian Kepa Lizarragak bizikletaren paperari buruzko hausnarketa egingo du ostiralean, hilak 16, izango den “Bizikleta eta Osasuna” hitzaldian. Halaber, larunbatean Bizikleta Jaia ospatuko da eta igandean, berriz, bizikleta martxa familiarra egingo da hiriko kaleetan zehar. Ez hori bakarrik, astelehenean, 16:00etatik aurrera oinez Talaia bidearen zati bat egingo dugu Jaizkibelgo landareak ezagutzeko. Amaiera gisa, asteazkenean, hilak 21, mugikortasun-mahai bat izango da arazoak komentatzeko eta mugikortasun-zailtasunei irtenbideak planteatzeko.
Hendaian ez dira atzean geratzen, irailaren 26tik 30era, St. Vincenteko eskola taldea klasera bizikletaz joateko eta itzultzeko deia egin die familiei. Gainera, irailaren 21erako bizikletaz orientatzeko lasterketa antolatu dute 14:00etatik 16:00etara.