Abuztuaren 21etik 23ra bitartean, Hendaia, Hondarribia eta Irun izango dira sustrai-musikaren eta publiko guztiei zuzendutako kultur jardueren topagune.
Bidasoa Folk jaialdiak bere XXV. edizioa ospatuko du aurten, Bidasoa eskualdeko kultur hitzordu garrantzitsuenetako bat eta mugaz gaindiko lankidetzaren adibide sendoenetakoa dela berretsiz. Abuztuaren 21ean, 22an eta 23an, Hendaia, Hondarribia eta Irun sustrai-musiken eta herri-kulturaren adierazpenen topagune bihurtuko dira berriro ere, tradizioa eta gaurkotasuna uztartzen dituen egitarau zabal baten bidez.
Aurtengo edizioaren aurkezpenean erakundeetako ordezkariek eta jaialdiaren zuzendaritza artistikoak parte hartu dute, azken 25 urteetan kultura-aniztasuna herritarrengana hurbiltzeko eta Txingudiko Badiaren bi aldeetako loturak sendotzeko egin den lana azpimarratuz.
Bidasoa-Txingudi Mugaz Gaindiko Partzuergoko Zuzendaritza Batzordeko zuzendaria Nuria Alzagaren hitzetan, “ohore handia da Bidasoa Folk jaialdiaren hogeita bosgarren ediziora iristea. Hogeita bost urtez kalitatezko kultura ireki eta parte-hartzailearen aldeko apustua egin dugu, musika tresna gisa erabiliz pertsonak eta lurraldeak elkartzeko. Jaialdia mugaz gaindiko lankidetzaren ikur bihurtu da eta udako ezinbesteko hitzordua da bai eskualdeko herritarrentzat bai bisitarientzat”.
Bestalde, Bidasoa-Txingudi Mugaz Gaindiko Partzuergoko Zuzendaritza Batzordeko kide Estitxu Urtizbereak nabarmendu duenez, “Bidasoa Folkek bere izaerari eutsi dio, aldi berean garatzen eta berritzen jakin duelarik. Aurtengo egitarauak sustrai-musikaren gaur egungo aberastasuna erakusten du, eta gure kultura-ondareak sormenerako, berrikuntzarako eta topaketarako duen gaitasuna agerian uzten du. Gure lurraldearen nortasun partekatua indartzen laguntzen duen jaialdia da”.
Bidasoa-Txingudi Mugaz Gaindiko Partzuergoko Zuzendaritza Batzordeko kide Pascal Destruhautek ere jaialdiaren izaera berezia azpimarratu du. “Bidasoa Folkek ezin hobeto islatzen du Partzuergoak urte luzez sustatu duen lankidetza espiritua. Kultura tresna aparta da komunitateak hurbiltzeko eta elkarguneak sortzeko. Jaialdiak hogeita bost edizio betetzeak erakusten du proiektu partekatu sendo baten aurrean gaudela, urtez urte indartzen eta hazten jakin duena”.
Sustrai-musikaren inguruko hiru jardunaldi
Jaialdia abuztuaren 21ean, ostirala, hasiko da Hendaian, Kospei Star taldearen kalejirarekin. Angelu hiriko talde honek Balkanetako erritmoetan oinarritutako musika eskainiko du hiriko kaleetan barrena, eguneko kontzertu nagusiari bide emanez. Bere proposamenak energia, tradizioa eta modernitatea uztartzen ditu, musika espazio publikora eramanez eta herritarrengana hurbilduz.
Abuztuaren 22an, larunbata, Hondarribiak hartuko du jaialdiaren jardunaldi nagusia. Bertan ariko dira Julie Rouault eta María Terremoto. Azkaineko artista gazteak eta flamenkoaren erreferente berrietako batek beren lurraldeetako kantu herrikoiak gaur egungo ikuspegitik berrinterpretatzen dituzte, tradizioarekiko lotura mantenduz eta belaunaldi berriengana iristeko gai diren proposamen pertsonalak eskainiz.
Jaialdiaren azken jardunaldia abuztuaren 23an, igandea, izango da Irunen, eta akordeoia eta haren aldaerak izango ditu ardatz, bereziki trikitia. Kantauri itsasoko herrialde askotan sustraitutako tresna honen garrantzia nabarmenduko da, herri-musikaren transmisioan izan duen paperari aitortza eginez.
Egun horretan Caamaño & Ameixeiras bikote galiziarra izango da oholtzan, sustrai-musikaren eszena berriko erreferenteetako bat. Haiekin batera ariko da Xabi Aburruzaga ere; musikariak bere ibilbide artistikoaren 25 urteak ospatuko ditu Bidasoa Folken eta, aldi berean, bere azken lana den Bask diskoa aurkeztuko du.
Jaialdiaren zuzendariaren esanetan, “hogeita bost urte betetzeak atzera begiratzeko eta egindako bidea baloratzeko aukera ematen digu, baina baita etorkizunari begira jarraitzeko ere. Sustrai-musika garaikidearen indarra erakusten duen egitaraua osatu dugu, tradizioa eta gaurkotasuna uztartzen dituzten artistekin. Bidasoa Folk aurkikuntzarako, emoziorako eta kulturen arteko topaketarako gune izaten jarraitzea nahi dugu”.
25 urteko ibilbidea erakusketaren bidez
Kontzertuez gain, jaialdiak hainbat jarduera osagarri eskainiko ditu, eskualde osoan duen presentzia indartzeko helburuarekin. Horien artean nabarmentzekoa da Bidasoa Folken 25 edizioetako kartelak biltzen dituen erakusketa.
Erakusketa doan bisitatu ahal izango da abuztuaren 23ra arte Bidasoaren Interpretazio Zentroan, Avenida Zubian kokatuta dagoen espazioan. Jaialdiaren bilakaera estetiko eta kulturala ezagutzeko aukera emango du, eta urte hauetan guztietan Bidasoa eskualdeko kultur eskaintza aberasten lagundu duen ekimenari omenaldia izango da.
Bere XXV. edizioarekin, Bidasoa Folkek kulturen eta lurraldeen arteko topagune izateko bokazioa berresten du, sustrai-musiken eta mugaz gaindiko kultur lankidetzaren erreferente gisa sendotuz. Kalitate artistikoaren, kultura-aniztasunaren eta elkarbizitzaren aldeko apustu sendoa da, eta aurten ere Hendaia, Hondarribia eta Irun musikaren inguruan elkartuko ditu.
