Irun, Hondarribia eta Hendaiako Udalek, Bidasoa-Txingudi Mugaz Gaindiko Partzuergoaren bidez, Hiruak Bat laguntzen deialdi berria abiarazi dute, mugaz gaindiko proiektuei zuzendua. Helburua da Bidasoa-Txingudi lurraldeko hiru hirien arteko lankidetza, trukea eta kohesioa sustatzen jarraitzea.
Laguntza hauek mugaren bi aldeetako erakundeen arteko lankidetza bultzatzen duten eta Irun, Hondarribia eta Hendaian eragina duten ekimenak babestera bideratuta daude. Hainbat arlotako proiektuak aurkeztu ahal izango dira, hala nola turismoa, kultura, ondarea, eleaniztasuna, gazteria, kirola, hezkuntza, ingurumena, mugikortasuna edo gizarte-ongizatea, besteak beste, betiere lurraldearen elkar ezagutza, parte-hartze bateratua eta integrazio sozial eta kulturala sustatzen badituzte.
Deialdiak 20.000 euroko aurrekontu osoa du 2026ko ekitaldirako, eta laguntzek proiektuen kostu osoaren %90era arte estali ahal izango dute, lortutako balorazioaren arabera. Proiektuak laguntza ematen den urtean hasi beharko dira, eta gehienez 12 hilabeteko iraupena izango dute.
Laguntza hauetara aurkeztu ahal izango dira Irun, Hondarribia edo Hendaian egoitza duten pertsona fisiko zein juridikoak, behar bezala eratu eta erregistratuak. Baldintza nagusien artean, proiektuek hiru hiriak barne hartu beharko dituzte, lurraldeko hiru hizkuntza ofizialen erabilera bermatu (euskara, gaztelania eta frantsesa) eta erakunde publiko, pribatu edo elkarteen arteko lankidetza sustatu.
Hautaketa-prozesua norgehiagoka bidez egingo da, eta honako alderdiak baloratuko dira: mugaz gaindiko lankidetza, erakundeen eta boluntariotzaren parte-hartzea, gizarte-eragina, komunikazio-planaren kalitatea edo aurrekontuaren koherentzia. Proiektuek gutxieneko puntuazioa lortu beharko dute dirulaguntza eskuratu ahal izateko.
Eskaerak deialdia ofizialki argitaratu eta bi hilabeteko epean aurkeztu beharko dira, bide elektronikoz edo Partzuergoaren bulegoetan, eskatzen den dokumentazioarekin batera; besteak beste, proiektuaren memoria, aurrekontua eta eskatzailearen administrazio-informazioa.
Deialdi honen bidez, Bidasoa-Txingudi Mugaz Gaindiko Partzuergoak berriro berresten du hiru hirien arteko loturak indartzen dituzten eta lurralde dinamiko, kohesionatu eta lankidetzarako irekia garatzen laguntzen duten proiektuen aldeko konpromisoa.
Eskaera aurkezteko azken eguna: ekainaren 28a barne.
Deskargatu dokumentazioa hemen:
