• Iaz bertan behera utzi zen, baina aurten Bidasoa Folken XX. edizioa abuztuaren 20an, 21ean eta 22an izango da.
• Doako sei kontzertu izango dira, Hondarribian, Irunen eta Hendaian.
Irun, Hondarribia eta Hendaiako udalek, Bidasoa-Txingudi Mugaz Gaindiko Partzuergoaren bidez, Bidasoa Folk-en XX. edizioa antolatu dute, Gipuzkoako Foru Aldundiarekin lankidetzan. Iazko udan ekitaldia bertan behera utzi ondoren, jaialdiaren antolatzaileek lan egin dute aurten ekitaldia modu seguruan egin dadin, betiere osasun arloko jarraibideak eta neurriak errespetatuz. Horrela, abuztuaren 20an, 21ean eta 22an, Hondarribian, Irunen eta Hendaian, hurrenez hurren, sei kontzertu egingo dira Folk eta musika garaikidearen munduan erreferentzia diren taldeekin, Murtzia, Gaztela-Leon, Bartzelona, Andaluzia, Okzitania, Portugal eta, nola ez, Euskal Herritik etorriak. Hala jakinarazi dute gaur goizean prentsaurrekoan Mugaz Gaindiko Partzuergoko Zuzendaritza Batzordeko kideek.
Irungo Udalaren izenean, Miguel Ángel Páezek nabarmendu duenez, “2020an ekitaldia bertan behera utzi ondoren, aurten inoiz baino gogo handiagoz gabiltza. Segurtasun neurri guztiak errespetatuz, jaialdi hau berriro antolatzea kalitatezko musikaren eta kultur aberastasunaren aldeko apustu sendoa da, betiere ekitaldiaren mugaz gaindiko izaera ardatz hartuta”.
Bestalde, Hondarribiko Udalaren izenean, Juan Luis Silanesek adierazi duenez, “Badiako hiru hiriak eszenatoki ezin hobeak dira horrelako kontzertuak hartzeko. Taldeak aukeratzeko orduan, Bidasoa Folk-en ezaugarri izan den kalitatea mantendu nahi izan da, eta ziur gaude kontzertuak atseginak izango direla bai herritarrentzat bai hilabete hauetan bisitatzen gaituzten pertsonentzat”.
Hendaiako Udala ordezkatuz, Richard Irazustak gaineratu duenez, “kontzertu guztiak doakoak eta adin guztietarako pertsonentzat dira. Uda ospatu nahi dugu eta gure lurraldeko espiritua erakusten duten musikekin egin nahi dugu”.
Kalitatezko programa
Bidasoa Folk Jaialdiak kalitatezko programa izan du beti, ospe handiko musikariekin. Besteak beste, Paco Ibañez, Kepa Junquera, Carlos Nuñez, Ruper Ordorika, Manuel Luna, Mikel Urdangarin, Mª Mar Bonet, Macka B & The Roots Ragga Band, Mayra Andrade, Joao Alfonso, Katia Guerreiro, Quimi Portet, Kalakan, Pedro Guerra, Carla Pires edo Sharon Shannon.
XX. edizio honetan, programa honako hau izango da:
Abuztuak 20 Hondarribian:
- Euskal Barrokensemble
Jaialdia Euskal Barrokensemblek irekiko du abuztuaren 20an, Hondarribiko Kasino Zaharreko lorategian, 19:00etan.
Enrike Solinisek 2006an Bilbon sortutako musika taldea da. Bere lehen bi diskekin antzoki eta jaialdi garrantzitsuenetan parte hartu du: Viena Konzerthaus, Stockholm Early Music Festival, Spring Festival Prague, Bilboko Musika-Mísica, Quincena Musical de San Sebastian, Madrilgo Auditorio Nazionala, Brujas Konzertgebouw, Montreal Baroque edo Sevillako Antzinako Musikaren Jaialdia.
Taldearen ezaugarri nagusiak interpretazioaren freskotasuna eta hurbiltasuna dira. Oso garai desberdinetako musika inprobisatzeko eta birsortzeko ahalmena du, ikuspuntu pertsonal argi batetik.
- La Musgaña & Vanela Muela
Euskal Barrokensembleren kontzertuaren ondoren, 20:00etan, La Musgaña & Vanela Muela taldeak eszenatoki berean joko du. ‘Raitán’ izeneko disko berria aurkeztuko du, anbizio handiko proiektu berritua.
Carlos Beceirok eta Jaime Muñozek duela 32 urte hasi zuten musika-proiektua da hau, eta, azken urte eta erdian, zuzeneko proiektu berri bat sortu dute, Luis Antonio Pedraza Zamorako musikari ezagunenetako bat taldean sartzeko egin duten apustua dela eta.
Abuztuak 21 Irunen:
- Juan José Robles
Irungo Juncal plazan egingo da Bidasoa Folken bigarren jardunaldia. 20:00etan hasiko da Juan José Roblesen kontzertuarekin.
Malvariche eta Mujeres-en taldearen sortzaileetako bat da, eta, bere ibilbidean zehar, beste talde batzuetan parte hartu du. Paco Muñozen agur-biran (2017-2018) eta SIMFÒNIC Pep Botifarra & Pau Chaferren (2018) parte hartu du, baita 30 disko baino gehiagotan ere.
Mandolina, lautea, bandurria edo gitarroa dira izen propioa duen proiektu bat sort duen musikari murtziar honen nortasun-ezaugarrietako batzuk.
- Alba Carmona
21:00etan Alba Carmonak abestuko du. Musika herrikoiaren eta musika modernoaren artean urteetan zehar mugitu den sustraiko musikaren aztertzailea da. Perico Sambeat, Carlos Saura, Chano Dominguez, Las Migas edo Mauricio Sotelo bezalako artistekin aritu da.
Musikan 18 urtean zehar izandako esperientziek, denboraren joanak eta ama izan berriaren emozioek eragin dute lehen aldiz bere ahotsarekin adierazteko beharra eta ia erabat berak konposatutako lehen diskoa osatzen duten bederatzi abestiri forma ematea.
Abuztuaren 22an Hendaian:
- Lambrusquera
21:00etan, Gaztelu Zahar frontoian, egun horretako lehen kontzertua emango du Lambrusquerak, Pirinioetako eta Okzitaniako kanta tradizionalen talde polifonikoak.
- Cocanha
Jaialdia 22:00etan itxiko du Cocanha taldeak. Toulouseko hiru emakumek osatzen dute, eta okzitanieraz baliatzen dira musika pirenaikoa eta gaskona jotzeko.
Soka-danborrekin eta gorputz-perkusioekin soinu naturala lortzen dute.
Segurtasun neurriak eta sarrerak
Kontzertu guztiak segurtasun neurriak errespetatuz eginen dira beti. Hala, Hondarribian gehieneko edukiera 200 pertsonakoa izango da, Irunen 300ekoa eta Hendaian 400ekoa.
Sarrerak kontzertu bakoitza hasi baino ordu erdi lehenago hartu ahalko dira espazio bakoitzaren sarreran. Tiket zenbakituak emango dira eta jendea banan banan eseriko da segurtasun tarteak mantentzeko.
Bidasoa Folk-en espiritua
2001ean sortua, proiektu honen jatorrizko asmoa folk musikako mugaz gaindiko jaialdia antolatzea zen, Hondarribia, Irun eta Hendaiako udalekin lankidetzan, Bidasoa-Txingudi Mugaz Gaindiko Partzuergoaren bidez.
Udal-lankidetza horri esker, kalitatezko folk musikaren jaialdia aurkezteko ahalegin guztiak bateratu ahal izan dira, doako kontzertuen bidez, askotariko ikusleak erakartzeko: Bidasoako herritarrak eta bisitariak, gazteak eta ez hain gazteak, zaleak....
Jaialdi honi esker, Bidasoa Txingudi eskualdeak kultura- eta turismo-interesa du, eta, aldi berean, hainbat herrialdetako musika eta tradizioak balioesten dira. Gainera, jaialdi honen kultura- eta musika-aniztasunak Bidasoa-Txingudiko kultura-aniztasuna nabarmentzeko aukera ematen du.